البلاتوه
عمرو أديب أستاذ ركوب التريند وأخذ اللقطة
البلاتوه هيجننا يا خلق يا هوه والكادر الآن قلقان داخل زوم إن على عمرو أديب
مجرد ما الفيس بوك اتكلم عن مداخلة الفنان عادل إمام مع الإعلامي المتميز شريف عامر، ويادوب لمح البعض إلى أن أداء "عامر" كان مش (قد كده)، عنها و"وأديب" مكدبش خبر، وطلع يقول شعر في "عامر" وأخد اللقطة خاصة، وأن كتير من رواد السوشيال ميديا قالت ياريت المداخلة كانت مع "أديب".
ولأن "أديب" أريب رهيب؛ فمن وسط كلام كتير قال للفنانة غادة والي: مافيش خبير فني وافق على التعليق ببرنامجي على رسوماتك.
مش بقولك أستاذ اخد اللقطة
لكن "غادة والي" قالت إن تأثرها بعمل فني أمر وارد، و أن الفنان الروسي جورجي كوراسوف المتهمة بسرقة تصميماته لم يوثق لوحاته عبر المنظمة العالمية للملكية الفكرية WIPO.
يعنى من الآخر خلينا نقول ان "كوراسوف" هو اللي غلطان ، مش عشان موثقش شغله عشان رسم من أساسه!
---------------------------
داغر وهاني فرحات وجدل مهرجان الموسيقى العربية
البلاتوه هيجننا يا خلق يا هوه والكادر الآن قلقان، داخل زوم أن على المايسترو هاني فرحات، واللي بقا مدير مهرجان الموسيقى العربية.
ألف ألف مبروك يا فنان وهاني فرحات للي ميعرفش هو المايسترو اللي أصالة احرجته .. المهم "فرحات" صرح بعدم مشاركة المطربين الذين شاركوا آخر دورتين من عمر المهرجان في الدورة الجديدة .. التصريحات دي دخلت رئيس دار الأوبرا الفنان خالد داغر جوه الصورة لأن عدد كبير عدد من المطربين طلبوا من "داغر" توضيح الأمر، على رأسهم الفنانة إيناس عز الدين، حيث وضح الأخير لها بعض الأمور بشأن الجدل المثار، ومن جانبه قال داغر لها: “مطربين دار الأوبرا المصرية مينفعش اننا نهمشهم."
طبعا "فرحات" سعيد بتوليه مهمة الدورة الجديدة وقال: "سعيد بثقة وزيرة الثقافة د. نيفين الكيلاني ورئيس دار الأوبرا د. خالد داغر وهما يدعماني ودائما التشاور معي وهذا الأمر يجعلني مطمئنا".
بس إحنا مش سعداء من اختفاء وزيرة الثقافة .. الست تعمل في صمت مطبق؛ كأننا في مدرسة صم وبكم والوزارة سكتم بكتم.
محمد رمضان ركب الناقة وشرخ بالدولارات
البلاتوه هيجننا يا خلق يا هوه والكادر الآن قلقان داخل زوم أن على النجم محمد رمضان واللي ظهر جالسا في هدوء تام غير مكترث برزم الدولارات (اللهم لا حسد) الموجودة في الكرسي المجاور له، وكالعادة انقلبت السوشيال ميديا راسا على عقب، وما بين حرام عليك وهو حر؛ جلس حزب الكنبة يتابع أسعار اللحوم، ويغني (نار يا حبيبي نار).
وفي رد سريع مريع ظهر الممثل خالد سرحان جالسا داخل (ميكروباص) و بجانبه بضعة جنيهات متناثرة وعلى وشه ملامح "الإرهاق والبؤس" اسم الله عليك يا فنان إيه اتخضيت من شكل الدولارات، ولا عاوز تاخد اللقطة وتركب التريند، ولا تتشهر ولا إيه بالضبط؟!
طبعا كتير من الفنانين والإعلاميين انتقدوا (أبو صيام) ووصل الأمر إلى البرلمان المصري، وبحسب موقع القاهرة 24، تقدمت النائبة آمال عبد الحميد بطلب لوزير المالية لمطابقة ملف محمد رمضان الضريبي مع أرباحه الحقيقية للتأكد من مدى التزامه بدفع الضرائب.
و نصيحة منى يا أبو صيام يا أخويا اتعلم من صديقك المهندس نجيب ساويرس .. شوف الراجل عنده شيء وشويات لكن طالع بتشيرت عليه ميكي ماوس.
وزي ما كلنا عارفين أن ما بين رمضان وعمرو أديب ما صنع الحداد ولميس الحداد قصدي الحديدي
انتقدت صورة النجم محمد رمضان وهو مرتديا عقالا عربيًا ويمتطي جملا، في شوارع الولايات المتحدة، قالت الإعلامية اللامعة عبر برنامجها «كلمة أخيرة» الذي تقدمه على شاشة ON: وكأن رمضان يحاول يؤكد الصورة اللي إحنا سنين بنحاول نمسحها من هوليوود وكنا بنلومهم أنهم بيتكلموا عن العرب والمسلمين أنهم بالشكل ده ، حتى لو كان ضمن تصوير كليب لكن المشهد ده بنحاول نمسحه من عقلية المنتج الأمريكي بنحاول نقولهم أننا دول كثير منها باتت متقدمة ومش بنركب جمال في الشوارع سواء الرياض أو دبي وعمان ولدينا تاريخ وحضارة ومتطورين ايضًا.
واللي متعرفوش الست لميس أن رمضان أجر الجمل عشان يرجع بيه مصر.
فوق البيعة
التنسيق الحضاري مقلش لوزيرة الثقافة أن صاحب العمارة هيكسرها؟!
فوق البيعة مصطلح لم يعد له وجود؛ لكنها رجعت تاني عشان تقولك إن هشتاج (سماح أنور تسب الشعب المصري) انتشر على مواقع السوشيال ميديا.
هو الموضوع بدأ، والعهدة على الراوي لما صاحب العمارة اللى كان ساكن فيها والد سماح أنور المخرج أحمد عبد الله ووالدتها الممثلة سعاد حسين رفض يعلق لافتة على مدخل العمارة مكتوب عليها "هنا عاش المخرج أحمد عبد الله والفنانة سعاد حسين"
طبعا ده تصرف غريب من صاحب العمارة، وإنكار لدور الفن ولقيمة الفنان، وفي المقابل بثت الفنانة سماح أنور فيديو قالت فيه من (المنقي يا خيار)، لكن فوق البيعة أحب اقولك يا فنانة ما فيش مانع تزعلي وتشوفي أن فيه ناس بقت بترفض الفن وحقك تغضبي وتدافعي عن الفنانين وفي مقدمتهم والدك ووالدتك؛ لكن التعميم مرفوض كونك تعايري الناس البسيطة ده شيء مش مقبول؛ ثم هي الناس ريحة عرقها فايحه ليه لان الصيف طلع، ومزيل العرق غلي ومحدش لاقي يحلق، مش زيكم يعني انتوا ناس عليوي وتقدروا تشتروا مزيلات للعرق وبودرة للرجلين.
وأما عن صاحب العمارة الذي هدد مندوبي وزارة الثقافة بأنه إذا تم وضع اللافتة على العقار سوف يقوم بتكسيرها؛ فلابد من معرفة سبب رفضه وإعلان هذا السبب للرأي العام .. ولابد من وزارة الثقافة أنها تتحرك وتفرض سيطرتها، ولا الوزارة هتعمل ودن من طين وودن من عجين.
--------------------------
لا بليغ ولا عبد الوهاب؟ .. الموجي هو اللي يكسب
* حضرتك سمعت عن حفلة مسرح الجمهورية؟
- تقصد الحفل الخاص بذكرى محمد عبد الوهاب وذكرى السنباطى؟
* أيوه
- لأ .. مسمعتش .. بس فوق البيعة أنا سمعت عن حفلة روائع الموجي بالسعودية
* طب والله كتر خيرهم
- تقصد السعودية
* لأ .. دا بتوع الأوبرا هيعملوا حفل من أعمال الموسيقار بليغ حمدي
- وهيهتموا بالدعاية؟!
* زي حفل السعودية؟!
- لأ طبعا زي حفل عبد الوهاب والسنباطي اللي محدش سمع عنها.
------------------------
كوبري المكرونة الاسباجيتي ناقص صلصة
شارك طلاب الفرقة الأولى بكلية الهندسة فرع المطرية جامعة حلوان، بمسابقة «Triple S»، وحصلوا على المركز الأول في فرع «Spaghetti bridge» بالمسابقة.
لحد هنا الخبر عادي؛ اللي مش عادي إن فريق «هندسة المطرية» صمم الكوبري باستخدام المكرونة الاسباجيتي بقدرة تحمل تصل إلى 100 كيلو.
(وبدون صلصة) قام الفريق بوضع قطع المكرونة «الإسباجيتي» فوق بعضها، وبطريقة هندسية وباستخدام لاصق قوي، وبمعايير وحسابات هندسية، تم تصميم الكوبري وفوق البيعة تقريبا كده الكباري ورانا ورانا.
وسط البلد
(من كواليس السلطة والفن والحياة وبعض مما كان)
فَلَما كَلَّ مَتني كلَّمتني
تحت عنوان (إحالة واضع سؤال «طرقت الباب حتى كلّ متني» باللغة الإنجليزية في بني سويف للتحقيق) نشرت جريدة المصري اليوم خبر كتبه عمرو الشيخ جاء نصه على النحو التالي:
فوجىء طلاب 3 مدارس بإدارة بنى سويف التعليمية بالصف الثانى الثانوى، بسؤال ترجمة به 4 اختيارات وتضمنت العبارة أبيات شعرية جاء بها «طَرقتُ البابَ حتى كَلَّ مَتني.. فَلَما كَلَّ مَتني كلَّمتني، فَقالت يا إسماعيل صبراً.. فَقلتُ يا أسما عِيلَّ صَبري»... إلخ.
طبعا السؤال اللي تضمن 4 اختيارات باللغة الإنجليزية، وعلى الطالب أو الطالبة يختار منها الإجابة الصحيحة تسبب في حالة جدل كبيرة من جيل التيك توك؛ فجيل المهرجانات.
وبيني وبينكم المشكلة ليست في السؤال ولا في الإجابة، المشكلة في هذا الجيل المنهار ثقافيا وتعليميا وفكريا .. هذا الجيل لا يعرف من الشعر إلا شعر (البيلي) فإن سألته عن أمل دنقل قالك لك شاعرة جميلة؛ فهو لم يسمع من قبل بأمير شعراء الرفض القنائي أمل دنقل.. هذا الجيل بلغت به التفاهة أن يحول القصيدة العظيمة لأمير الشعراء أحمد شوقي إلى مهرجان!! نعم (اختلاف النهار والليل ينسي) تحولت لمهرجان !! ولم العجب ونحن في بلاد العجب العجاب.
ثم كل الدوشة دي ليه؟ وهو كده كده إحنا خارج التصنيف العالمي للتعليم! وكده كده ولي الأمر بيدي ابنه ولا بنته دروس خصوصية وهو عارف والطالب عارف وأنت يا عزيزي القاريء عارف ان الوحيد المستفيد في الموضوع كله هو المدرس الخصوصي، وان الطالب كده كده هيخش كلية والسلام، وياخد في نهاية الدراسة حتة ورقة، ويشتغل وياخد خبرات في كل شيء إلا في مجال تخصصه .. هو ده مربط الفرس إننا لازم نعترف أن التعليم مش محتاج تطوير هو محتاج يتغير شكلا موضوعا فكرا وعملا، المنظومة مش مصممة لبناء طالب فكره حر خلاق متجدد مبتكر.
اتذكر منذ فترة ليست بالبعيدة تداول نشطاء الفيس بوك صورة امتحان رياضيات لطالب بالمرحلة الابتدائية في ثلاثينيات أو أربعينيات القرن الماضي، وتحدث الجميع مؤكدين أن نفس الاختبار لو جاء اليوم لطلاب المرحلة الإعدادية لرسبوا وعقد النشطاء مقارنة بين الامتحان القديم والامتحانات الحديثة وسخر الجميع من نفسه.
أتذكر موقفا غريبا حدث لي، عندما كنت طالبا بالدراسات العليا؛ كنا بندرس مادة اسمها على ما اتذكر (نظم تعليم) فجناب الفقيد قصدي المعيد كان ممسكا بكتاب في يده وقال بملو فيه:
ان انجح طرق التعليم في العالم هي الطرق الغربية، وفي مقدمتها الدولة الفرنسية... وعلل ذلك مستدركا بالعامية: ليه بقى؟ لان الدستور الفرنسي دستور علماني ديمقراطي غير قابل للتجزئة، وده انتج مناخ عام خرج منه نظام تعليمي ناجح. انتهى المعيد وأنا توقعت كشيء بيديهي ومنطقي إنه هيقول، والمفروض يبقى دستورنا علماني (بنفس القياس) فينتج نظاما تعليميا ناجحا .. وتوقعي ده المفروض يتوقعه أي واحد مش هقولك بيحضر دراسات عليا؛ لأ خالص ده أي حد طبيعي سمع كلام المعيد هيتوقع انه هيقول كده (قياس بقياس على نفس القياس) مفهاش فن ولا ذكاء ولا إعجاز فكري.
وإذ به يقول ولكن العلمانية لا تناسبنا ولولا أصدقائي الذين شغلوه؛ لكان عرف مصدر صوت الضحك، وكنت طردت شر طرده.
------------------------------
مينا ناصف
من المشهد الأسبوعية
